फंड फूका ! उत्तर पूरब क्षेत्र की छ्वीं

गढ़वाली हास्य -व्यंग्य 

 सौज सौज मा मजाक मसखरी 

   हौंस,चबोड़,चखन्यौ   
    सौज सौज मा गंभीर चर्चा ,छ्वीं  

                                  फंड फूका ! उत्तर पूरब क्षेत्र की छ्वीं 

                                      चबोड़्या - चखन्यौर्या: भीष्म कुकरेती
(s = आधी अ )

         ब्याळि  जब सरा भारत वासी संजय दत्त को जेल जाण, उख जेलौ तापमान, उख जेलम वातवरण मा पौलिसन प्रतिशत, जेलम संजय दत्त को कमरा मा सरसु ह्वाल कि ना, जेलक कुठड़ि म संजय का वास्ता खुट पसारणो, नाक साफ़ करणों बान कथगा जगा या सुविधा च आदि का बारा मा अति चिंतित छया। कथगोंन त माननीय गृह मंत्री को बयान की भी मांग कार।
       इन मा संजय  दत्त की गम्भीर परिस्थिति बारा मा समाचार दींद दींद बीच मा ऐनडीटीवी चैनेलन एक समाचार दे -
       महाराष्ट्र के दसवीं कक्षा के सरकारी इतिहास पाठ्यपुस्तक  में नक्से में अरुणाचल प्रदेश को चीन  का भाग दिखाया गया है और महाराष्ट्र शासन ने नौ लाख सरकारी पुस्तक बाजार से वापस मंगवाई हैं। महाराष्ट्र  के मुख्यमंत्री ने सरकारी पाठ्यपुस्तक में अरुणाचल प्रदेश को नक्से में चीन का भाग दिखाने पर खेद जताया। उत्तर पूर्व के लोग भारत के अन्य  क्षेत्रीय बुद्धिजीवियों , राजनीतिज्ञों , समाचार माध्यमों पर उत्तर पूर्व की अवहेलना का आक्षेप कई दशकों से लगाते आ रहे हैं।
मीन स्वाच कि असल मा पाठ्यक्रम कमेटी मा इन  चिंतन मनन ह्वे ह्वालु।   


 पाठ्यक्रम संचालक - हाँ तो प्रदेश का सबसे अधिक डिग्री धारी अध्यापक गण!  भारत को इतिहास अर समाज विज्ञान का बारा मा आप सब दस अध्यापकों से जादा कै तैं ज्ञान नी च।
सबि दस महान ज्ञानी अध्यापक (इकदगड़ि )  -धन्यवाद ! थैंक यूं 
पाठ्यक्रम संचालक -हां तो आपन पिछ्ला छै मैना मा प्रदेश की दसवीं कक्षा वास्ता 'भारत का इतिहास अर समाज' विषय बारा मा ज्वा किताब तैयार करी   आज संक्षिप्त अवलोकन होलु अर फिर या किताब प्रेस माँ छपणो चलि जालि। तो एकेक क्षेत्र का बारा मा संक्षिप्त मा हम बात करदवां। चलो दक्षिण से शुरू करदवां।
दक्षिण को पैलो  इनचार्ज- सर हम दुयूनं दक्षिण भारत का प्रांत ही ना एकेक   गांवक इतिहास, भूगोल, समाजशास्त्र  की सैकड़ो किताब पौढिंन  अर तब जैक पाठ्यक्रम तैयार कार
दक्षिण को दुसरो इनचार्ज - अर सर ! हमन दक्षिण भारतौ सही नक्सा तैयार करण मा पूरा एक महीना लगायी। हद से जादा मनत कार। पाठ्यक्रम तै पौढिक दक्षिण भारतीय विद्वान् बि हमारी प्रशंसा कारल 
पाठ्यक्रम संचालक -   बहुत बढ़िया। पश्चिम भारत का इनचार्ज ..?
पश्चिम भारत का पैलो इनचार्ज -हमन भि जथगा किताब पढ़न छे पौड़ अर पश्चिम भारतौ बारा मा पाठ्यक्रम तैयार कार। नक्सा तैयार करणम बि हमन बड़ी सावधानी बरत।
पाठ्यक्रम संचालक - मध्य भारत को पाठ्यक्रम -
मध्य भारत को पाठ्यक्रम का दुयि इनचार्ज - सर   हमन मध्य भारत को  सार गर्भित इतिहास अर समाज शास्त्रौ पाठ्यक्रम तैयार कार। नक्सा मा कखि बि गल्ती नी मीललि 
उत्तर भारत का इनचार्ज - श्रीमान !  उत्तर भारत का बारा मा दुनिया मा जो बि साहित्य उपलब्ध छौ वांको हमन गहन  अध्ययन कार अर तब उत्तर भारतौ इतिहास मुतालिक पाठ्यक्रम तयार कार।नक्सा तै बीस ज्ञानियों से जंचवाइ।
पूर्वी भारत का इनचार्ज - सर ! बिहार , बंगाल अर ओड़िसा को इतिहास व समाज पर इन पाठ्यक्रम आज तक तैयार ही नि ह्वाइ जन हम दुयुन कार। नक्सा बि हमन दस दै सर्वे ऑफ इंडिया से जांच करवाई
पाठ्यक्रम संचालक (किताबौ कॉपी दिखद ) - अरे इखमा त उत्तर पूर्वी राज्यों इतिहास अर समाज को बारा मा कुछ नी च। हाँ भै?
एक - सर क्या रख्युं च उत्तर पूर्व का राज्यों मा
दुसर - हाँ सर ! उत्तर पूर्व का राज्यों पर कु कारो इथगा परिश्रम!
तिसर -  उत्तर पूर्व का राज्य बि क्वी राज्य छन !
चौथो - सही ब्वाल
पांचो - जथगा गाँ तथगा बोलि भाषा।
छटो -फण्ड फूको उत्तर पूर्व की बातो तैं 
पाठ्यक्रम संचालक - हाँ मि बि उत्तर पूरब तैं क्वी महत्व नि दींदो अर सचि ब्वालो त मैं तैं बि नी पता कि यी उत्तर पूरब राज्य क्या बला छन।
सतों - कख छा लग्याँ तुम बेकार की बातों मा। वै से बढ़िया त सलमान खान की फिल्मो बारा मा छ्वीं लगौला धौं!
अठों - नै यार ! आमिर खान की फिल्मों मा विषय भौत ही सटीक , दिल पर चोट करण वाळ होंदन। मीन तो आमीर खान को फेमिली ट्री (पारिवारिक इतिहास ) को गहन अध्ययन कार अर पायि कि आमीर खान को प्रथम पुरुष सन सात सौ मा अफगानिस्तान अर रूस को बॉर्डर बिटेन भारत ऐ छौ।
नवों - य़ार स्टार वैल्यू तो शाहरूख खान को बि कम नि च हाँ। मेरी अठारा साल की बेटी तो शाहरुख खान से शादी करणों तैयार च !
दसों -खानों मा दिखे जावो तो पटकथाकार सलीम खान को योगदान  महत्वपूर्ण च हाँ!
पाठ्यक्रम संचालक - अर तुम लोग ! खानों को खान युसूफ खान उर्फ़ दिलीप कुमार तैं बिसरी गेवां हैं ?
सबि - नहीं सर ! हम सौबुन भारत को इतिहास और समाज को पाठ्यक्रम तैयार  करण मा युसूफ खान को इतिहास की पूरी जानकारी हासिल  कार
पाठ्यक्रम संचालक - अरे चार बजि गेन अर ठीक पांच बजि मि तैं सम्पूर्ण पाठ्यक्रम की कॉपी मथि दीण अर अबि तलक उत्तर पूर्वी राज्यों बारामा पाठ्यक्रम मा कुछ नी च। इन कारो उत्तर पूर्वी राज्यों बारा मा जो बि थोड़ा भौत जै तैं बि आँदो वो कम्प्यूटर ओपरेटर तैं डिक्टेट करी द्यायो अर इन्टरनेट से उत्तर पूर्वी राज्यों नक्सा की नकल कौरिक लगै द्यायो। पण यु सौब पांच बजे से पैल  ह्वे जाण चयेंद। मि तैं  एक कोंफ्रेसं माँ 'समग्र भारत' पर एक व्याख्यान दीणो जाण तो आप लोग ही '  भारत का इतिहास अर समाज' की कॉपी नकल प्रदेश पाठ्यक्रम कमेटी अध्यक्ष तैं मेरी तरफान सौंपी देन।
सबि -ठीक च सर ! पांच बजि से पैल उत्तर  पूर्बी राज्यों बार माँ थ्वड़ा भौत  जोड़िक अर इंटरनेट से नक्सा जोड़िक हम 'भारत का इतिहास अर समाज' किताब की कॉपी  नकल प्रदेश पाठ्यक्रम कमेटी अध्यक्ष तैं आपौ  तरफान सौंपि  द्योला।
एक - अच्छा !  संचालक जी चलि गेन। तो उत्तर पूरव भारत  को बारा मा क्या करे जावो।
दुसर - करण क्या च कम्प्यूटर ओपरेटर तै बोलि दींदा बल जो बि वैक  समज मा आंद वो उत्तर पूरब भारत को बारा मा लेखि द्यावु अर इंटरनेट बिटेन नक्सा छपै द्याव।
तिसर - चलो यो ही ठीक च। अब जरा फ़िल्मी  खान भाईओं इतिहासौ बारा मा गहन चिंतन करे जावो।
सबि - हां हाँ फिल्मी खान भाईओं इतिहास पर वुद्धिजीवी  चिंतन अति आवश्यक बि  च।
  

 

Copyright @ Bhishma Kukreti  18/05/2013           
(लेख सर्वथा काल्पनिक  है )


--

 

 

 

 

Regards
Bhishma  Kukreti